Категорија: Едукација

Важноста на годишните одмори, правилното насочување и оптимизација на работната сила за продуктивност на работното место

Грижата за вработените го опфаќа менталното, физичко и емоционално здравје, како и економската благосостојба под влијание на односите на работното место и одлуките кои се носат. Тоа е засилено со позитивната компаниска култура која дава приоритет на благосостојбата на вработените, преку јасно дефинирани работни задачи и придобивките како финансиска поддршка, здравствени бенефити и други мерки кои придонесуваат за подобрување на рамнотежата помеѓу работата и животот.

Флексибилно работно време, разни планови за здравствено осигурување, термини за спортски активности, часови по јога, соби за релаксација, гејминг соби… Компаниите се повеќе се потпираат на ваков вид придобивки за да ја зајакнат благосостојбата на вработените. Со воведување на такви поволности, работодавците се уверени дека вработените ќе се чувствуваат подобро и позадоволно на работното место и дека тоа ќе има влијание на подобрување на балансот помеѓу работата и животот. Но дали е тоа навистина така?

Еден извештај на Галуп (иако постар) покажува дека дури 76% од вработените признаваат дека доживеале симптоми на исцрпеност (burnout) на работното место, од разни причини кои варираат од лошо управување, преку нереално голем обем на работни обврски, до нефер третман на работа. За жал, лошите статистики не застануваат тука. Се почести се отсуствата од работа поради преголем стрес, а постојат и ситуации во кои вработените изјавиле дека работеле и кога не се чуствувале добро.

И покрај сите фантастични поволности и активности во компаниите, вработените сè уште се под стрес на работното место, а тоа влијае негативно на нивното ментално и физичко здравје. Ваквата состојба не влијае само на индивидуалните перформанси на вработените, туку и на бизнисот како целина. Затоа тука мора да го поставиме прашањето: Дали можеме да направиме нешто повеќе? Одговорот е: секако дека да, но прво да видиме кои се најголемите причини за стрес и незадоволство на вработените:

1. Лош лидерски стил – сигурно сте ја слушнале изреката дека вработените си одат заради лоши претпоставени, не заради лоша работа. Лошиот начин на управување доведува до зголемен стрес на работното место. Некоректен однос, микроменаџмент, често префрлање и критикување од страна на претпоставените не само што доведува до зголемен стрес, туку прави вработените да се чуствуваат некомпетентни и недоволно добри за работната позиција.
2. Преголем обем на работа – Кратки рокови или додавање екстра работни задачи поради недостаток на работна сила не само што го зголемуваат незадоволството кај вработените, туку и доведуваат до намалување на квалитетот на завршената работа. Во оваа ситуација веќе не е приоритет вработените да се посветат и квалитетно да ја завршат работата, туку да не се пробие рокот, независно од квалитетот на завршената работа.
3. Нејасно дефинирани работни задачи – Без јасно дефинирани работни задачи вработените се чуствуваат збунето и тешко можат да одредат кои се приоритетите.
4. Недостаток на мотивација – Работата треба да биде позитивно искуство и понекогаш платата не е доволен мотиватор за да се задржи квалитетно ниво на работа. Доколку вработените често добиваат репетитивни работни задачи кои не им даваат никаков предизвик тие ќе бидат помалку мотивирани да направат нешто плус за себе и за компанијата.

Можеме да продолжиме со набројување, но сметаме дека е поважно да се посветиме на тоа што може повеќе да направиме за благосостојбата на нашите вработени и како тие да бидат среќни, мотивирани и продуктивни.

• Нови улоги и одговорности – Доделувањето на нови улоги и одговорности го елиминира чувството на монотонија и репетитивни работни задачи и прави вреботените да бидат помотивирани и поангажирани со цел да бидат успешни во новата улога или во извршувањето на новите работни задачи
• Нови вработувања и ревитализација на работното место – Нови вработувања носат и нови перспективи и вештини во компанијата. Нагласете ја важноста на стратешкиот процес на регрутирање, како и важноста на правилниот онбординг процес за да бидете сигурни дека новите членови на тимот се во линија со културата и целите на компанијата.
• Важноста на одморот – одморот го подобрува моралот на вработените, влијае позитивно на продуктивноста и го намалува стресот. Но да расчистиме – одморот треба да е одмор и не треба да биде прекинуван со јавувања, мејлови и пораки од претпоставените кои се поврзани со работа.
• Полугодишни и годишни анализи на перформансите: Полугодишни или годишните анализи се клучни за проценка на перформансите на вработените, а со тоа и поставување на цели и планирање на професионалниот развој. Градете култура на позитивен фидбек. Редовната комуникација и евалуации на вработените придонесуваат за постојано подобрување и успех на самата организација.

Доколку ги имплементирате овие работи во компанијата може да создадете просперитетна и продуктивна работна средина во која вработените ќе бидат посреќни, ќе имаат можност да се развиваат и да придонесуваат за целокупниот развој на компанијата.

Во изминатиот период во Тривити организиравме тренинг програма за Кариерен развој, наменета за вработени и невработени лица, кои сакаа да се стекнат со нови знаења и алатки, со цел пронаоѓање работа, промена на работно место и развој на кариерата.

Работејќи со учесниците во рамки на сесиите и со кандидатите за работните позиции за кои посредуваме, имав можност да запознаам различни профили од аспект на образование, професија, искуство, возраст, потреби и желби. Некои од нив, земајќи ги предвид аспектите кои го сочинуваат нивниот профил, имаа визија краткорочно или долгорочно кон што би се стремеле и кој би бил нивниот следен професионален предизвик. Добар дел ја чувствуваа потребата од промена на работното место, но често ги слушав коментарите: „не знам од каде да почнам“, „како да продолжам од тука, па натаму…“, „дали правилно ќе го изберам следниот чекор“, „ризично е, да не згрешам“. И сите се сложивме дека предизвиците со кои се соочуваат им се реални и заеднички:

• Пред се, тешко донесување одлука за барање на работа или промена на работно место – да се договориме сами со себе што навистина сакаме
• Да се себеспознаат – кој/а сум и што сакам
• Чувствуваат страв да започнат, страв да направат промена
• Имаат недоверба кон процесот, кон компаниите и менаџментот
• Им недостига знаење од каде да започнат
• Намалена самодоверба – дали ќе бидам доволно добар/ра на новото работно место
• Притисок од разни стереотипи (образование, искуство, пол, возраст…)
• Постоечки разлики помеѓу понудата и побарувачката
• Немање доволно информации за центри за кариерно советување и можности за преквалификација
• Претходни лоши искуства заради недостиг на структуриран ‘onboarding’ процес во компаниите
• Неподготвеност за прилагодување од двете страни – компании и баратели на работа
• Зголемени трошоци за живот и потреба од прилагодување
• Недостиг на лидерство во рамки на компаниите и на раководните позиции

Списокот можевме да го прошириме, верувам секој имаше уште нешто да додаде, но се сложивме дека покорисно за сите е да се обидеме предизвиците да ги претвориме во можности, на дилемите да најдеме решенија, на прашањата да дадеме одговори и да ја надминеме оваа состојба.

Па започнавме од тоа дека треба да донесеме одлука. Дали сакаме да најдеме работа, дали сакаме да направиме промена и колку сме одлучни во тоа? Ова е првиот и најважниот чекор – да се договориме со себе која ни е целта, кои ни се опциите, кои се позитивни и негативни страни и конечно да одлучиме.

Самоевалуација – да се спознаеме себе си. Едноставно да тргнеме од тоа кои се нашите интереси – што ни привлекува внимание, ни буди љубопитност, има значење за нас, каде и како би сакале да работиме. За таа цел може да се послужиме со тестови кои ќе ни помогнат во дефинирање на интересите. Потоа, какви компетенции поседуваме – нешто за што имаме самодоверба, имаме дадена доверба од други лица и докажани резултати. И нашите вредности, уникатната суштина, највисоката форма на изразување и поврзување – што и кои сме во сегашноста, уверувања за тоа што е важно, а пожелно да е усогласено со компаниските вредности, бидејќи само така ќе има задоволство во работењето, постигнати резултати и достигнати цели.

Зајакнување на работната етика и самодисциплина како состојба на умот, значајна за успех не само во професионалниот, туку и во приватниот живот. Спој од начинот на однесување, морални принципи, вредности, верување, убедување – какви сме ние и како се однесуваме кон работата и воопшто кон обврските во животот. Никој не е роден со силна работна етика – таа се креира и се тренира уште од најрана возраст и зависи само и единствено од нас.

Одржување кондиција преку култура на континуирано учење, која ќе не направи различни и конкурентни. Стремење да го претвориме фиксниот ум во развоен, со што ќе имаме позитивен став, зголемена самодоверба и резилиентност, ќе водиме исполнет и свесен живот.

Подготовка на личен развоен план за вработување. Одредување на главна цел, разделување на помали, краткорочни цели и активности и внимавајте, важно е да се одредат датуми и рокови, како не би останале само желби. Издвојување на потенцијални работни позиции и компании, каде би биле среќни, задоволни и посветени, мотивирани да го дадеме најдоброто од себе.

Активности за вмрежување. Најдобро поврзаните луѓе се едни од најуспешните. Времето инвестирано во вмрежување секогаш се исплатува. Воспоставување односи со клучни луѓе кои можат да ни помогнат да научиме нешто ново, да дојдеме до нова работа. Градење релации, а не „фаќање врски“. Пријатели и доверба се стекнуваат, тоа е двонасочна улица на давање-земање и долготраен процес. 

И секако, да побараме пријател. Тимот на Тривити секогаш се повикува на својата прва вредност, а тоа е Луѓето пред сѐ!. Моите колеги и јас сме посветени да го споделиме нашето знаење и да поттикнеме личен и професионален раст кај сите баратели на работа. Оттука, имајте нѐ за ваш несебичен пријател, чија врата е секогаш отворена, за секој оној кој е во процес на барање работа, има потреба од советување, насочување и поддршка.

Марија Акимовска